fatafeet السكر

السبت، ٣٠ أغسطس ٢٠٠٨

رمضان السنه دي ..ياريت يكون احلي


السلام عليكم ورحمه اللله وبركاته
كل عام وانتم بخير وطاعه وسلام وسعاده
بقلنا كتير بنستناه وحشني اوي
انا حاسه اني مستعدتش لستقباله لسه .. مش عرفه ليه ..!
نفسي اوي في رمضان بتاع زمان اللي انا للاسف ملحقتوش
من كلام اخواتي وولاد عمي عليه حسيت ان الجو اللي احنا فيه ده مش جو رمضان
يقعدوا يفتكروا وهما صغيرين اما كان جدو(الله يرحمه)يجبلهم الفوانيس ويعلقو الشرشيب والزينه في الشارع واما كانت العيله كلها تتجمع مع بعض ساعة الاكل
اما الوقتي معدش حد بيفتكر يشتري فانوس او حتي يعلق زينه رمضان الله اعلم يمكن الدنيا خدتهم وشغلتهم
بس ليه مش من حق الجيل اللي طالع يحس برمضان وفرحته او يعرف ان في حاجه اسمها فانوس رمضان بينور وشكله حلو مش اللي طالع الايام دي والصين مدلعاه بيغني ويرقص عشره بلدي
كنت بسمع من ماما وبابا ان الفنوس زمان كان بيبقي معدن وليه باب عشان يحطو الشمعه فيه تحس انه كان
فنوس جميل اوي
انا مش بحقد عليهم ولا حاجه بس انا كان نفسي اكون موجوده ايام زمان لانها كانت ايام بركه وخير يمكن اللي في سني يكونوا لحقو حبه لكن انا للاسف مكنتش موجوده في مصر في فترة طفولتي ..كنت في السعوديه يعني بعيد عن جدو ..عن جو العيله واللمه معلقتش زينا ولا شفت فنوس في الشارع
ودي اخرة اللي يعيش بره بلده ..يفوته حاجات حلوه كتير
بس الحمد لله بحاول اعوض ده الوقتي
ان اسفه وجعتلكم دماغكم بدل ما اقولكم رمضان كريم واتكلم علي اغاني رمضان اللي انا مسمعتهاش وانا صغيره او بتاع الكنافه والقطايف اللي مشفتوش الا وانا كبيره
بس الحمد لله اني موجوده معاكم السنه دي عشان نحس مع بعض برمضان
الحمدلله
رمضان كريم

4 تعليقات:

في ٣٠ أغسطس ٢٠٠٨ ١٢:٣٩ م , Anonymous غير معرف يقول...

كل سنه وانتي طيبه
أسأل الله أن يبلغك رمضان
وأن يجعلك تزهي حسنا وسط الجنان..

 
في ٣١ أغسطس ٢٠٠٨ ٢:٣٨ ص , Blogger mo7amed mamdo7 يقول...

السلام عليكم
ازيك كل سنة وانتى طيبة شرفنى زيارتك وخصوصا لما طلعنا بلديات تحياتى ليكى ورمضان كريم

 
في ٣١ أغسطس ٢٠٠٨ ١٠:٠٦ ص , Blogger مـجـنـووون يقول...

كل سنه وأنتي بالف خير

علي فكرة من كتر المشاكل وواجع الدماغ إلي الناس فيه مبقوش يحسوا برمضان

والله انا عندي نفس الشعور

ربنا يرحمنا برحمته
تقبلي مروري
مجنون

 
في ١ سبتمبر ٢٠٠٨ ٤:٣٧ ص , Blogger المحرر الصحفي والشاعر : عمــاد الدين يوســـف يقول...

اختي الغاليه ساسو كل عام وانتي بخير ويارب يبلغنا كلنا رمضان وليلة القدر يارب العالمين
رمضان له مذاق واحد مذاق الرحمه ورغبة المغفره والتقرب من المولى عز وجل بس ضغوط الحياه حالت دون شعور الناس بكل هذه القيم الجميله وصرفت هم الناس لنفقات الطعام والشراب و..الخ
تحياتي

 

إرسال تعليق

الاشتراك في تعليقات الرسالة [Atom]

<< الصفحة الرئيسية