مولود جديد...رشوا الملح

السلام عليكم ورحمة الله

من غير كتر كلام ولا رغي علي الفاضي

انا عملت مدونه جديده لاني الصراحه مش عارفه اتعامل مع حكايه الاكواد وhtml

فانا قررت وعملت مدونه اسمها((fatafets))

وان شاء الله هتكون مقري الرئيسي في عالم التدوين

ياريت تزوروها وتعجبكم

شكرا

سااااسو

http://fatafets.blogspot.com/

رمضانيات

رمضان مش طفاسه وملي كرش ,,رمضان ده عبادة ولومفيش قرش

قولنا رمضان ده للعباده.... قالوا مسلسلات ودي عاده ...

قولنا ترويح ودي سنه...قالوا فوازير ودي مهمه...

ملحوظه:الرسمه من رسوماتي الرمضانيه

رجعواا مع هلال رمضان

السلام عليكم ورحمة الله

كل سنه وانتم طيبين

انا قلت لازم ابعت تهنئه مخصوصه من هنا من فتا فيت السكر

تهنئه كبيره مكلبظه ومتختخه ..واحلي تحيه واحلا سلام للناس اللي شرفونا وهنونا برمضان

مش هذكر اسماء لانهم كتير اوي اوي

بس انا هذكر مدونه وحده لانها من زماااان وهي مكنتش موجوده وظهرت مع هلال رمضان

مدونه كترخيركم

بتاعت اختي شكريه واخوي شكري

ويارب يرجعو تاني يكتبو وميغيبوش عننا تاني

واحب اقولهم.........كتر خيركم

دي مش تفرقه ولا حاجه بس يعني لزوم القرابه وكده

وده لنك المدونه بتاعتهم ياريت تزوروها وتشجعوهم ...هتعجبكم

http://ktr7ercom.blogspot.com/

رمضان السنه دي ..ياريت يكون احلي

السلام عليكم ورحمه اللله وبركاته
كل عام وانتم بخير وطاعه وسلام وسعاده
بقلنا كتير بنستناه وحشني اوي
انا حاسه اني مستعدتش لستقباله لسه .. مش عرفه ليه ..!
نفسي اوي في رمضان بتاع زمان اللي انا للاسف ملحقتوش
من كلام اخواتي وولاد عمي عليه حسيت ان الجو اللي احنا فيه ده مش جو رمضان
يقعدوا يفتكروا وهما صغيرين اما كان جدو(الله يرحمه)يجبلهم الفوانيس ويعلقو الشرشيب والزينه في الشارع واما كانت العيله كلها تتجمع مع بعض ساعة الاكل
اما الوقتي معدش حد بيفتكر يشتري فانوس او حتي يعلق زينه رمضان الله اعلم يمكن الدنيا خدتهم وشغلتهم
بس ليه مش من حق الجيل اللي طالع يحس برمضان وفرحته او يعرف ان في حاجه اسمها فانوس رمضان بينور وشكله حلو مش اللي طالع الايام دي والصين مدلعاه بيغني ويرقص عشره بلدي
كنت بسمع من ماما وبابا ان الفنوس زمان كان بيبقي معدن وليه باب عشان يحطو الشمعه فيه تحس انه كان فنوس جميل اوي
انا مش بحقد عليهم ولا حاجه بس انا كان نفسي اكون موجوده ايام زمان لانها كانت ايام بركه وخير يمكن اللي في سني يكونوا لحقو حبه لكن انا للاسف مكنتش موجوده في مصر في فترة طفولتي ..كنت في السعوديه يعني بعيد عن جدو ..عن جو العيله واللمه معلقتش زينا ولا شفت فنوس في الشارع
ودي اخرة اللي يعيش بره بلده ..يفوته حاجات حلوه كتير
بس الحمد لله بحاول اعوض ده الوقتي
ان اسفه وجعتلكم دماغكم بدل ما اقولكم رمضان كريم واتكلم علي اغاني رمضان اللي انا مسمعتهاش وانا صغيره او بتاع الكنافه والقطايف اللي مشفتوش الا وانا كبيره
بس الحمد لله اني موجوده معاكم السنه دي عشان نحس مع بعض برمضان
الحمدلله
رمضان كريم

هي والله هي ..بس في مشكله بسيطه

ايوه هي دي المدونه..متستغربش

بس حصل حاجات غريبه كده ومش فهماها فبعتزر منكم
هتوقف فتره لغايت اما اشوف حل للمشكله دي وادعولي
يمكن دي فرصه اعمل نيولوك علي رمضان

كل سنه وانتم طيبين
ورمضان كريم

رسوماتي1

السلام عليكم

كل سنه وانتم بخير

وعدتكم اني هحط رسوماتي ,,

ودي اول رسمه هعرضه وياريت تقولو رأيكم بصراحه (مش هزعل أنا بقبل النقد البناء) ولو فيها حاجه عيزه تتعدل ياريت تنصحوني بيها

اتخنقت..لا..زهقت

الحقوني ياناس ياهوووو
انا معنتش قدره استحمل اكثر من كده
خلاص فاض بيه الكيل
اتخنقت
لازم تشوفوا حل بسرعه ..لان لو فضلت المشكله دي علي الحال ده هيحصل حاجات مش كويسه وهيكون في ضحايا كتير ومش هنعرف نلاحق عليهم .
كل المشكله وما فيها ان ليه ميكنش في البيت اكثر من كمبيوتر ؟!!
ليه ميكنش لكل مواطن كمبيوتر خاص بيه؟!!!
بدل ما الواحد بيشحت الكمبيوتر كل شويه خمس دقائق يعد عليه
ليه الحكومه متحطش علي بطاقه التموين كل شهر فاتورة نت وتصرف لكل مواطن كمبيوتر مدعوم.........؟!!!
انشاء الله ياجماعه اوعدكم اما امسك الرئاسه(محدش يفهم غلط..ده كلام ) وتبقه فلوس البلد دي في ايدي هصرف لكل مواطن كمبيوتر واحط قانون جديد في الدستور بينص علي(معاقبة أي حد يتجرأ ويلمس الكمبيوتر بتاع اخته لكن اخوه ماشي)
بس لازم نشوف حل مؤقت دلوقتي لغاية اما امسك الحكم
مش بعرف اقعد علي الكمبيوتر الا بعد الفجر لان في احتلال ماشاء الله ربنا رزقني بثلاث صبيان ربنا يصبرني عليهم(اخواتي) والمشكله كمان انهم اكبر مني يعني مقدرش افتح بقي ):

بس برجع وقول ماهما برضه عيزين يقعدو وليهم حاجاتهم اللي يعملوها عليه وزي ماانا كده ادمنته اكيد هما برضه

زي بعضه اهم اخواتي برضه

فأعزروني في زياراتي المتأخره لمدونتكم واني احيانا مبقدرش اعلق لاني في الوقت ده بكون فصلت شحن

يلا ليه ربنا ..يصبرني ويهديهم ..ويرزقني كده بكمبيوتر لاب توب عشان اخدو في حضني كده واهرب بيه ومقعدش حد عليه

اديني قعده بحلم بصبرنفسي

قلم رصاص ..واسرح معاه

الرسم من اجمل النعم اللي خلقها الله سبحانه وتعالي ولازم نحمده عليها حتي ولو لم تكن موهوبا ولكن عندك القليل القليل منها فغيرك لايستطيع ان يرسم او حتي يمسك بالقلم فالحمد لله علي النعمه التي منى بها علي فأنا زي ما بيقولوا بعرف ارسم بس انا مش حاسه بكده فقلت اخد رايكم .

انا هحط رسمه والباقي مره تانيه

انا اول اما اكتشفت الموهبه دي كانت وانا في المدرسه ((كله هيفكر في حصه الرسم)) لا الصراحه كانت في حصه الانجليزي كان بيتجلي اوي الفن اول اما المستر يدخل ويقعد يقرأ من الكتاب وانا اتابع اول سطر وبعد كده اسرح ولاقي الاقلم الرصاص اشتغل شغل الله ينور.





في مره رسمت المستر واصحابي شفوه ومقدروش يمسكو نفسهم من الضحك كان شبه بالضبط ويومها المستر زعقلنا .

ملحوظه:الرسمه اللي فوق دي مش المستر (:

وطبعا نميت الموهبه دي ..اقولكم ازاي

كنت ايام امتحانات الثانويه العامه وانا بزاكر لازم يكون معايه قلم ولازم يكون رصاص((عشان الرسمه تطلع حلوه)) اقصد المذكره امسك الكتاب من هنا وهي اول صفحه واقرب حته فاضيه الاقي القلم سرح مني ورسم رسمه .

في مره كنت بذاكر جيولوجيا والمادة دي انا بحبها قوي فكنت بستخدم الالوان في مذكرتها ..كنت بذاكر في امانة الله لقيت صفحه فاضيه كالعاده القلم سرح مني وفجأه لقيت اخويه هجم علي المذكره وقعد يزعق يزعق ((يا ماما..ياماما تعالي شوفي بنتك عمله نفسها بتذاكر وقعده ترسم)) ...

طبعا ماما قعدت تزعق وتدي نصابح ((ربنا يخليها لي يارب))


وهي دي قصتي مع الرسم والبركه في حصه الانجليزي

اااه يا مصر اااه

ليه يامصر بحس ان معدش فيكي رجاله
زمان كنت اسمع ((وراك رجاله ))يعني ايه؟!
يعني حمايه ..يعني امان..يعني تمشي في الشارع وعارفه ان محدش هيقدر يضايقك اويمس شعره منك.
انا مش عرفه ايه اللي حصل لرجالتك يامصر فين الشهامة والخوف علي بنت البلد فين الاحترام والادب فين الدين فين....فين..فين..
الحكايه دي بتحصل كل يوم
مش معايا ولا مع غيري بس يمكن لكل بناتك وستاتك يامصر .
المواصلات واللي بيحصل في المواصلات من ((قلة ادب ))مقدرش اقول عليها غير كده
اما تكون راكب وفاكر ان مصر لسه بخير ويحصل حاجه زي اللي حصلت لقربتي وهو مقدرش اقول عليه غير (تحرش)ده علي الرغم من ان المواصلات عندنا مش زحمه يعني الركاب مرتحين ,يعني مفيش عزر..انك تفكر انه مش اخد باله مثلا او مكنش قصده
اتكلمت قربتي وزعقت للبني ادم ده(مقدرش اقول عليه راجل)وكانت فاكره ان اما تعمل كده حد من الرجاله اسفه من اشباه الرجاله الموجدين هيتكلم اويقوم حد ويضربه ..لا ده مفيش حد نطق بكلمه او اتهز من مكانه وقومه او اعترض حتي بكلمه
صم ..بُكم..عُمي
واللي يغيظ ويفرس ان اول اما عملت كده وقف المكروباص ونزل يجري وبعدها السواق يقول بكل برود "ابوه اما عرف كده جوزه بقالو اسبوع "يابرودك يااخي
بزمتكم ماهي حاجه تفرس وتجيب الضغط هو ده اللي قدرت عليه ..يعني فاهم اللي حصل وعارف كده.طيب بتركبه ليه؟
اما عرفت الحكايه دي قلتلها كويس اوي انك اتكلمتي غيرك مقدرش ينطق اويتكلم وكأن لساني وقف ومقدرتش غير اني اقول للسواق نزلني هنا..
والمشكله ان الموقف اللي حصل معايه كان من واحد قد والدي يعني مكنتش اتصور كده ابدا
زمان كنت مفكره اني لو ماشيه في شارع وعلي جانب منه شباب بيعاكس والجانب التاني راجل كبير اني اعدي من قدام الرجال الكبير احسن لكن الوقتي معدش فيه فرق..امشي من نص الشارع احسن حتي خبطة العربيه ارحم.
وماتلاقي الاطفال يادوب طلعين من البيضه وبيعكسوا وبيقولو كلام كبير اوي علي سنهم .
يبقه من حقي اقول فين رجالك يامصر ..ولالأ................؟!!!!
مفيش ثقه خلاص كان فيه مقوله بتقول( حرص ولاتخون )انا بقول في الزمن ده ((حرص ومتأمنش لحد ))
وفي النهايه بعتزر لكل الرجال المحترمين في هذا الزمان وان عرفه ان لسه في رجاله محترمين بس اقليلين اوي
وعايزه اعرف امتي بقه مصر ترجع زي زمان ..بلد الامن والامان وشهامه ولاد البلد والتحلي بأخلاق الاسلام .

ياريت نرجع زي زمان

حرام علينا

حرام علينا ظلمنا ناس كتير وهما أقرب الناس لينا ويمكن ماحبينا زيهم قبل كده ويمكن ولا بعد كده ..
ناس عمرها ماقصرت معنا , لا..دي لو الدنيا كلها ملكهم كانو خلونا اسعد ناس ..ناس لو كانت اللقمه اللي في ايدهم هي اخر حاجه في الدنيا دي مش هيبخلوا بيها علينا.
حب عمري ماشفت قده ....خوف عمري ماحسيته
حنان عمري ماهنساه....ألم عمري مادقته
مشعرفه اقول ايه
اهلنا غلين علينا مهما بعدت الاماكن ..مهما اتغير الزمان
جوه قلوبنا وفي عنينا ..عمري ماهنسى يوم حنان
دقته في بتنا وبين خواتي ..المحبه في قلبهم
عمري ماهنسى يوم في عمري عدا عليا في حضنهم