fatafeet السكر

الأربعاء، ٢٠ أغسطس ٢٠٠٨

اتخنقت..لا..زهقت

الحقوني ياناس ياهوووو
انا معنتش قدره استحمل اكثر من كده
خلاص فاض بيه الكيل
اتخنقت
لازم تشوفوا حل بسرعه ..لان لو فضلت المشكله دي علي الحال ده هيحصل حاجات مش كويسه وهيكون في ضحايا كتير ومش هنعرف نلاحق عليهم .
كل المشكله وما فيها ان ليه ميكنش في البيت اكثر من كمبيوتر ؟!!
ليه ميكنش لكل مواطن كمبيوتر خاص بيه؟!!!
بدل ما الواحد بيشحت الكمبيوتر كل شويه خمس دقائق يعد عليه
ليه الحكومه متحطش علي بطاقه التموين كل شهر فاتورة نت وتصرف لكل مواطن كمبيوتر مدعوم.........؟!!!
انشاء الله ياجماعه اوعدكم اما امسك الرئاسه(محدش يفهم غلط..ده كلام ) وتبقه فلوس البلد دي في ايدي هصرف لكل مواطن كمبيوتر واحط قانون جديد في الدستور بينص علي(
معاقبة أي حد يتجرأ ويلمس الكمبيوتر بتاع اخته لكن اخوه ماشي)
بس لازم نشوف حل مؤقت دلوقتي لغاية اما امسك الحكم
مش بعرف اقعد علي الكمبيوتر الا بعد الفجر لان في احتلال ماشاء الله ربنا رزقني بثلاث صبيان ربنا يصبرني عليهم(اخواتي) والمشكله كمان انهم اكبر مني يعني مقدرش افتح بقي
):

بس برجع وقول ماهما برضه عيزين يقعدو وليهم حاجاتهم اللي يعملوها عليه وزي ماانا كده ادمنته اكيد هما برضه

زي بعضه اهم اخواتي برضه

فأعزروني في زياراتي المتأخره لمدونتكم واني احيانا مبقدرش اعلق لاني في الوقت ده بكون فصلت شحن

يلا ليه ربنا ..يصبرني ويهديهم ..ويرزقني كده بكمبيوتر لاب توب عشان اخدو في حضني كده واهرب بيه ومقعدش حد عليه

اديني قعده بحلم بصبرنفسي

9 تعليقات:

في ٢٠ أغسطس ٢٠٠٨ ١٠:٣٦ م , Blogger المدون / أحمد كجول يقول...

السلام عليكم
بعد التحية و السلام نفيدكم علما بأن مدونة
شباب الصحبة
بدأت المرحلة الاولي من العمل و نحن نقدم الان أجرأ و أكثر المقالات التي تتنوع ,, نرجو منكم المشاركة من جديد ابداء الرأي علي المواضيع وبدأ التعليق ,, كما أرجو المشاركة في الاستفتاء

دة أمل ليا و شرف ,, انا حكون سعيد لو تمنحهولي

مجهود أكثر من 5 شهور ينتظر أجابة فرد

و جزاكم الله خيرا علي كافة الاحوال
http://so7bah.blogspot.com/

ويريت تكلميني علي ميلي علشان موضوع مهم
mrshawaah@yahoo.com

 
في ٢٣ أغسطس ٢٠٠٨ ٥:١٨ ص , Blogger abo salah يقول...

بعد السلام عليكم


أنا لما لقيتك قولتى
انشاء الله ياجماعه اوعدكم اما امسك الرئاسه وتبقه فلوس البلد دي في ايدي هصرف لكل مواطن كمبيوتر

قولت خلاص .. هاكون من أول المرشحين

ولما كملت الجملة ولقيت القانون بتاع
معاقبة أي حد يتجرأ ويلمس الكمبيوتر بتاع اخته لكن اخوه ماشي

صرفت نظر عن ترشيحك نهائى
ههههههههههههههههههههههههههههه

يالا ياستى أن شاء الله الحصار يتفك قريب
وتقدرى تقعدى براحتك

ولا أقولك
أن شاء الله ربنا يرزقك وتجيبى اللاب توب قريب

تحياتى

 
في ٢٣ أغسطس ٢٠٠٨ ١١:١٤ ص , Blogger ساسو يقول...

ليه بس كده يا ابو صلاح مأنت كنت ماشي كويس
طيب اقولك رشحني انت بس وهديك بدل الواحد اتنين (رشوه)
ولو زعلان اوي كده من القانون خلاص ياسيدي اغيرهولك انت تأمر بس
ويسمع منك ربنا ان شاء الله

 
في ٢٣ أغسطس ٢٠٠٨ ١١:١٩ ص , Blogger ساسو يقول...

أزال المؤلف هذا التعليق.

 
في ٢٥ أغسطس ٢٠٠٨ ٣:٢٠ م , Blogger eslam يقول...

انا عندى استعداد ارشحك بس ممكن برشوه
رايك ايه ........

 
في ٦ سبتمبر ٢٠٠٨ ٧:٣٣ م , Blogger مصري بالغربة يقول...

انا كمان عايز كمبيوترين عشان ارشحك

مع اني عارف ان الدم بيحن وحاجي على اخر لحظة وارشح الرجل بردوا

معلش متزعليش بس اصل احنا رجالة وبنقف وقفة رجالة

هههههه

شاكر ليكي جدا زيارتك لمدونتي اولا

وثانيا ربنا يفرجها عليكي وتجيبي لاب توب

بس فيه سؤال

ايه اول حاجة حتعميليها بعد ما تشتري اللاب توب ؟

 
في ٧ سبتمبر ٢٠٠٨ ١:١٤ م , Blogger ساسو يقول...

اسلام
لا ياخوويه مش عيزه صوتك مادام برشوه
الله الغني
بس ممكن اديك كمبيوتر بس ده ميعتبرش رشوه دي هديه ...ولا ايه
مصري بالغربه
شكرا لزيارتك ومنور المدونه
وحكايه الكمبيوترين دي افكر فيها ..دي حاجه مش بالساهل
وياعم رشح الراجل احسن انا عن نفسي هرشح الراجل بس بشرت يكون هيوزع كمبيوتر
ولو علي وقفه الرجاله ممكن ستات يقفو معاكم ولا لأ...؟
اما اول حاجه هعمله بعد اما اجيب الاب توب
هوصل نت وفضلاخداه في حضني علي السرير وادخل علي كل المدونات ومن ضمنها مدونتك

 
في ١٦ سبتمبر ٢٠٠٨ ٣:١٤ م , Blogger من غير عنـــوان يقول...

اتشطري واتخرجي واشتغلي وهاتيه من فلوسك

(:

طبعا ده حق لكل مواطن

 
في ١٧ سبتمبر ٢٠٠٨ ٦:٤٩ ص , Blogger ساسو يقول...

من غير عنوان
شكرا لوجود حضرتك في مدونتي
ووالله انا نفسي اشتغل
عشان احس بقيمتي في هذه الدنيا واقدر اجيب اللي انا عيزاه واحس بقيمته
بشكر حضرتك مره تانيا

 

إرسال تعليق

الاشتراك في تعليقات الرسالة [Atom]

<< الصفحة الرئيسية